“50% жеңілдікті алып тастау қажет”. Депутат жүргізушілерге қойылатын талапты қатаңдатуды ұсынды

Сенат депутаты Марат Қожаев жол қозғалысы ережелерін жиі бұзатын жүргізушілерге айыппұл төлеу кезінде берілетін 50% жеңілдікті алып тастауды ұсынды, деп хабарлайды Bugin.kz порталы.

Сенатордың айтуынша, қазіргі айыппұл жүйесі жолдағы заң бұзушылықтардың алдын алуға жеткіліксіз. 

“Біз жүргізушілердің жауапкершілігін арттыру мақсатында бірқатар өзгеріс енгізуді ұсынамыз. Әкімшілік құқықбұзушылық туралы кодекске (ӘҚБтК) түзетулер енгізіп, бір жыл ішінде он және одан көп ереже бұзған жүргізушілерді міндетті түрде теориялық емтиханды қайта тапсыруға міндеттеу қажет. Сондай-ақ қайталанған құқықбұзушылықтар үшін жазаны қатаңдатып, тіпті уақытша жүргізуші куәлігінен айыруды қарастырған жөн. Бұдан бөлек, жүйелі түрде ереже бұзатын жүргізушілерге айыппұл төлеу кезінде берілетін 50% жеңілдікті міндетті түрде алып тастау қажет”, – деді Қожаев.

Айыппұл – мәселенің түпкілікті шешімі емес

Депутаттың пікірінше, жүргізушілерге салынатын айыппұл заң бұзушылықтарға тосқауыл бола алмай отыр. 

“Қазіргі таңда техникалық құралдар автоматты режимде тіркеген жол ережесін бұзу фактілерінің саны 3 708 084-ке жеткен. Алайда қолданыстағы тәжірибе бұл заң бұзушылықтарды жүйелі түрде болдырмауға мүмкіндік бермейді. Себебі айыппұл көлік иесіне жазылады, бірақ нақты жүргізушінің ереже бұзу тарихы ескерілмейді. Сонымен қатар заңнамалық нормаларда жүйелі ереже бұзатын жүргізушілерді қайта емтихан тапсыруға міндеттеу қарастырылмаған. Ал техникалық құралдар тек құқықбұзушылық фактісін тіркегенімен, жүргізушінің біліктілігін немесе жолдағы қауіпті әрекеттерге бейімділігін бағалай алмайды”, – деп түсіндірді сенатор.

Жиі заң бұзушыларға қатаң шаралар қажет

Қожаев кейбір жүргізушілер үшін айыппұл төлеу жауапкершілікке тартылудың орнына, қалыпты жағдайға айналып кеткенін атап өтті.

“Мысалы, Алматыда бір жүргізуші бір жылдың ішінде 143 рет ереже бұзып, 3 миллион теңгеден астам айыппұл төлеген. Мұндай жағдайлар жауапкершіліктің әлсіздігін көрсетеді”, – деді ол.