Шерзат Болатты өлтірді деген күдіктілер түрмеде туған күн тойлаған (ВИДЕО)

Желіде 16 жастағы Шерзатты өлтірді деген күдіктілер тергеу изоляторында туған күнін тойлап жатқан видео пайда болды, деп хабарлайды Bugin.kz порталы. 

Видеоны мына сілтемеден көресіз.

Алматы облысының полиция департаменті бұл жағдайға қатысты түсініктеме берді. 

"Барлық кінәлі, соның ішінде басшылық та қатаң жауапкершілікке тартылады. Тергеу барысы ерекше бақылауға алынды”, - делінген ақпаратта.

Видеоның таралу фактісі бойынша жан-жақты тексеру жүргізіліп жатыр.

Еске салайық, 4 қазанда Талғарда жаппай төбелес салдарынан 16 жастағы жасөспірім Шерзат Болат қаза тапты.

Алматы облысының полиция департаменті Шерзаттың өліміне қатысы бар деген күдікпен 11 адамды ұстап, уақытша ұстау изоляторына қамауға алды.

Көп ұзамай, 9 желтоқсанда Шерзаттың ағасы Нұрқанат Ғайыпбаевтың мәйіті табылды. Полиция оның суицид жасағанын мәлімдеп, дәлел ретінде туыстарына қалдырған қоштасу хатын көрсетті. Онда Нұрқанат бауырының жанына жерлеуді өтінген.

Сот-медициналық сараптама оның өлімін асылу салдарынан болған механикалық асфиксия деп көрсетті.

10 желтоқсанда Шерзаттың әкесі Қаржаубай Нұрымов ұлы мен бауырының өліміне байланысты БАҚ өкілдерімен кездесуді талап етіп, наразылық білдіруге шықты. Алайда көп ұзамай полиция оны ұстады.

Полиция департаментінің хабарлауынша, Нұрымов заңды талаптарды орындамай, агрессивті әрекеттер көрсеткен, өзін-өзі өлтіремін деп қорқытып, полиция қызметкеріне пышақпен шабуыл жасаған.

Бұл әрекеттер оның айналасындағыларға қауіп төндірген. Нәтижесінде Шерзат Болаттың әкесі мен әпкесі қамауға алынды. 

Олар 15 тәуліктен кейін босап шықты. Ал қаңтар айында бір топ бұзақының қолынан қаза тапқан 16 жастағы Шерзат Болаттың ісі бойынша сотқа дейінгі тергеу аяқталды.