Пара алатын шенеуніктерді ашкөздік билейді – Антикор төрағасы

Антикор төрағасы Асхат Жұмағали еліміздегі сыбайлас жемқорлықпен күрестің өзекті мәселелерін талқылады, деп хабарлайды Bugin.kz порталы.

Журналист Ерболат Мұхамеджанның "Уәде" авторлық бағдарламасына берген сұқбатында агенттік төрағасы сыбайлас жемқорлықтың себептері туралы айта келе, бұл қылмыстың пайдакүнемдік мақсатта жасалатынын атап өтті.

"Әрбір қылмыстың өз себебі бар. Ал сыбайлас жемқорлық істерінде бұл – пайдакүнемдік. Пара алатын шенеуніктерді ашкөздік басқарады. Бұл – адам бойындағы ең қауіпті кемшіліктердің бірі", – деді Асхат Жұмағали.

Агенттік төрағасы сыбайлас жемқорлыққа қарсы күрес жүйелі көзқарасты талап ететінін баса айтты.

"Біздің міндетіміз – жүйелі тәсіл қалыптастыру: адамдарды тәрбиелеу, құқықтық сауатты арттыру, адалдық қағидаттарын насихаттау. Осылайша біз қоғамның сыбайлас жемқорлыққа қарсы иммунитетін күшейтеміз", – деді ол.

Асхат Жұмағали сыбайлас жемқорлыққа қарсы күресте тек уәкілетті органдар ғана емес, барлық мемлекеттік институт, соның ішінде сыбайлас жемқорлыққа қарсы идеологияны қалыптастыруда маңызды рөл атқаратын Мәдениет министрлігі де екенін де атап өтті.

"Бұл іске барлық мемлекеттік органдар, соның ішінде Мәдениет министрлігі де қатысады. Идеология мәселесі өте маңызды", – деді ол.

Агенттік төрағасы сыбайлас жемқорлық қылмыстары үшін қатаң жаза қарастырылғанын еске салды.

"Бүгінгі таңда аса ірі көлемде пара алғаны үшін 15 жылға дейін бас бостандығынан айыру жазасы қарастырылған. Сыбайлас жемқорлық үшін сотталған шенеуніктер шартты түрде мерзімінен бұрын босату құқығына ие емес. Сонымен қатар, олар мемлекеттік қызметке және квазимемлекеттік секторға жұмысқа орналасу құқығынан өмір бойына айырылады" – деп түйіндеді Асхат Жұмағали.