“Қазақмыс” кенішіндегі апат: жеті жұмысшының денесі табылды

Ұлытау облысы Жаңаарқа ауданындағы “Қазақмыс” корпорациясына қарасты “Жомарт” кенішінде тау-кен массасы опырылып, жеті жұмысшы қаза тапты, деп хабарлайды Bugin.kz порталы. 

ТЖМ іздестіру-құтқару жұмыстары барысында "Қазақмыс"корпорациясы ЖШС-не тиесілі кеніштен жеті қызметкердің денесі табылғанын мәлімдеді. 

“Олардың жеке басы анықталуда. Қайтыс болған жеті жұмысшының денесі сот-медициналық сараптама жүргізу үшін полиция қызметкерлеріне тапсырылды”, — деп жазылған ТЖМ хабарламасында.

Премьер-министр Олжас Бектеновтің тапсырмасымен апаттың себептерін анықтау және зардап шеккендерге көмек көрсету мақсатында арнайы комиссия құрылды. Оған премьер-министрдің орынбасары Қанат Бозымбаев жетекшілік етеді.

Оқиғаға байланысты құқық қорғау органдары да тексеру жүргізіп жатыр.

Полиция департаментінің мәлімдеуінше, аталған факті бойынша ҚР ҚК 277-бабының 3-бөлігі – “Тау-кен немесе құрылыс жұмыстарын жүргізу кезінде қауіпсіздік ережелерін бұзу” бойынша қылмыстық іс қозғалды. Қазір оқиға орнында жедел-тергеу топтары жұмыс істеп, қажетті тергеу амалдары жүргізіліп жатыр.

Айта кетейік, “Жомарт” кеніші Жезқазған қаласынан оңтүстік-шығысқа қарай 130 шақырым жерде орналасқан. Кеніште мыс сульфиді өндіріледі. “Қазақмыс” корпорациясының ірі акционері – Kazakhmys Copper.