Үкімет шахтада жұмыс істеу жүйесі мен тәсілдерді өзгертпекші

Вице-премьер Қанат Бозымбаев “Қазақмыс” корпорациясының басшылығымен кеңес өткізді, деп хабарлайды Bugin.kz порталы.

Тиісті тергеулерден кейін компанияда келісімшарттық міндеттемелер қайта қаралатын болады. Әрі Бозымбаев шахтадағы тергеу бітпейінше жұмысты жалғастырмауды тапсырды. 

“Тергеу оның қауіпті немесе қауіпсіздігін көрсетпейінше, шахтадағы жұмысты қайта бастау туралы ойламаңыздар. Жүйе мен тәсілдерді түбегейлі өзгерту қажет, біз мемлекет тарапынан оларды күшейтеміз. Өнеркәсіптік қауіпсіздік комитеті құрылды, біз заңнамаға өзгерістер енгіземіз. Қазір Парламентте тиісті заң жобасы қаралып жатыр, осы заң жобасы шеңберінде Төтенше жағдайлар министрлігіне қосымша өкілеттіктер берілетін болады”, - деді Қанат Бозымбаев компания басшылығына.

Вице-премьер мұндай жазатайым оқиғалардың алдын алу үшін Үкімет бар күш-жігерін салатынына уәде берді.

Еске салайық, 17 ақпан күні Ұлытау облысында қайғылы жағдай болды. “Жомарт” кенішінде болған төтенше жағдай салдарынан жеті қызметкер үйіндінің астында қалып, мерт болды.

Айта кетейік, Бектенов шахтадағы апат салдарынан қаза тапқандардың отбасына көңіл айтқанын хабарлаған едік.