Сауд Арабиясында өткен келіссөз нәтижесі қандай? Трамп ақшаның есебін сұрады

Трамп Украина мен Ресей арасындағы соғысқа украиндықтарды кінәлап, берген ақшаның есебін сұрады, деп хабарлайды Bugin.kz порталы. 

Президент Трамп АҚШ пен Ресей арасындағы келіссөздерге пікір білдірді. Ол Украина басшыларын айыптап, Владимир Зеленскийге шүйлікті. 

“Менің ойымша, бұл соғысты тоқтатуға мүмкіндігім бар. Бұл өте жақсы жүріп жатыр. Бірақ бүгін мен Украина тарапынан “біз шақырылмадық” деген сөздерін естідім. Олар соғыста үш жыл болды. Олар бұл соғысты үш жыл ішінде аяқтауы керек еді. Олар соғысты бастамауы керек еді. Соғыс болмағанда бірде-бір адам өлмейтін еді, бірде-бір қала қиратылмайтын және бірде-бір күмбез бұзылмайтын еді. Бірақ олар теріс шешім қабылдады”, — деді Трамп. 

АҚШ президенті соғыстың әлі күнге дейін жалғасып жатқанына Киевті кінәлады. Әрі АҚШ көмек ретінде бөлген ақшаны қайда жұмсағаны туралы есепті талап етті.

“Украина ақша төлеуге немесе ақшаның қайда кеткенін айтуға мәжбүр болады”, – деді Дональд Трамп.

Еске салайық, кеше Сауд Арабиясындағы Эр-Риядта АҚШ пен Ресей делегациясының Украинадағы соғыс бойынша келіссөзі басталғанын хабарлаған едік.