“7 жылға көлік жүргізу құқығынан айыру әлемдегі қатаң ең қатаң жаза” - депутат

Мәжіліс депутаты Николай Арсютин ішкі істер министрі Ержан Сәденовке елде мас күйде көлік жүргізгендерге қатысты жазаны жеңілдету керегін айтты. Қолданыстағы жаңа заң бойынша жаза қолдану халықтың жағдайына кері әсерін тигізіп жатыр екен, деп хабарлайды Bugin.kz порталы. 

Николай Арсютин қолданыстағы заңнамада көрсетілген 7 жылға көлік жүргізу құқығынан айыру және 15 тәулікке қамау жазасы тым қатаң деп мәлімдеді. 

“7 жылға жүргізуші куәлігінен айыру – әлемдегі ең қатаң жазалардың бірі, бірақ өзге жағдайларды есепке алмайды. Мысалы, жол апатының тіркелмеуі, алкогольдің аз мөлшерде анықталуы. Ең бастысы, мұндай қатал жаза тағайындауға медициналық қорытынды себеп болады”, – деді депутат. 

Мәжілісмен бұл жазаның кесірінен курьерлер, такси жүргізушілері жұмыссыз қалып жатқанын, кіріс көзінен айырылғанын айтты. Аталған бап енгізілгелі 200 мыңнан аса адам жауапқа тартылыпты. 

“2022-2024 жылдары тіркелген жол апатының саны 62 317, соның ішінде алкогольді ішімдік ішіп апат жасағандар саны 1 266. Германия, Франция, АҚШ пен Ресейде жазаның жеңілірек түрі қарастырылған. Осы тұста ішкі іштер министрлігіне келесі сұрақ туындайды: мұндай қатаң шара қабылдауға негіз бар ма? Бәлкім, куәландырудың нақты ережесін жасайтын уақыт келген шығар. Сонда әр адам зертхана таңдау құқығына ие болып, қайта тексерілуге мүмкіндік алар еді», – деді Арсютин.