Қазақстанда алаяқтықтың жаңа түрі тарады

Астанада дроппердің қылмыстық ісі әшкереленді, деп хабарлайды Bugin.kz порталы. 

Жедел-іздестіру барысында 20 жастағы дроппер ұсталды. Ол қылмыстық топқа шоттарға қолжеткізу үшін деректер мен банк карталарының реквизиттерін жүйелі түрде беріп отырған. Бұл алаяқтық схемаға елорда тұрғыны тап болған. Жәбірленушіге белгісіз нөмірлерден қоңырау шалып, өзін банк қызметкері ретінде таныстырған алаяқтар оның шотына кибершабуыл жасалғанын айтып, қаражатты қауіпсіз шоттарға аудару керектігін хабарлаған. Жәбірленуші сеніп, алаяқтар көрсеткен шотқа 1 миллион теңге көлемінде ақша аударған. Алайда ақша аударылғаннан кейін, күдіктілер байланысқа шықпай қойған. 

Қылмыстық істі тергеу барысында елорда киберполиция қызметкерлері алаяқ көрсеткен шоттардың бірінің иесін және оның орналасқан жерін анықтады. Аталған факт бойынша қылмыстық іс тіркелді.

Полицейлер ұсталған азаматтың осындай басқа да қылмыстарға қатысы бар-жоғын тексеріп жатыр. Қазіргі уақытта күдікті ұсталып, уақытша ұстау изоляторына қамалды.