Елде TikTok желісіне кәмелетке толмаған балалар кіре алмауы мүмкін

Депутаттар TikTok-та кәмелетке толмаған балалар үшін шектеу енгізуді ұсынды, деп хабарлайды Bugin.kz порталы. 

Депутат Жанарбек Әшімжанов TikTok-та пайдалы контенттерге қарағанда, жастарға теріс әсер ететін зиянды ақпараттар көп екендігін айтып, дабыл қақты.  Сөзінше, қазірдің өзінде әлем елдері бұл желіге шектеу қойып жатыр. 

Мәжісменнің дерегі бойынша, соңғы екі жылда аталмыш платформаға 14,1 млн қазақстандық тіркеліпті. Желінің негізгі тұтынушылары  балалар мен жастар көрінеді. Депутат TikTok-та құмар ойындар жарнамаланып, стримдер арқылы әдепсіз әрекеттер көрсетіліп жатқанына алаңдаулы. Тіпті діни уағыздар оңды-солды таралып, тыйым салынған заттардың жарнамасы секілді теріс әрекеттерге шақыратын ақпарат көп екендін айтты. 

Депутаттар TikTok-тағы теріс әдеттерге шақыратын барлық контентке шектеу қоюды, кәмелеттік жасқа толмаған балалардың пайдалануына қатаң шектеу қоюды немесе мүлдем тыйым салу тетіктерін қарастыруды ұсынып отыр.