Астанада вокзалдағы жарылыс: контейнер қайдан келгені айтылды

Көлік вице-министрі Талғат Ластаев Астана теміржол вокзалындағы жарылған контейнер қайдан келгенін айтты, деп хабарлайды Bugin.kz порталы. 

Еске салайық, 14 ақпанда Астана теміржол вокзалында электроқұрылғылар тасымалданған контейнер жарылғанын хабарлаған едік. 

“Бұл контейнер Еуропалық Одақтан келген. Оның ішінде дизель генераторы болған. Жарылыс болды. Қазіргі уақытта оның себептерін анықтау үшін тергеу жүргізіліп жатыр”, - деді Ластаев. 

Астанада ескі вокзал маңында болған жарылыстан кей жерлерде терезелер сынған.

"Қазақстан темір жолы" баспасөз қызметінің мәліметінше, Астана станциясының сұрыптау жолында жүк контейнерінде "қатты дыбыс" шыққан. Алдын ала мәлімет бойынша, контейнерде трансформаторлар мен генераторлар сияқты электроқұрылғылар болған. Қаза тапқандар жоқ, бір адам қолын жеңіл жарақаттаған. Бұл факт бойынша көлік полиция департаменті "Теміржол көлігін пайдалану немесе қозғалыс қауіпсіздігі ережелерін бұзу" бабы бойынша қылмыстық іс қозғады.