Қазақстанның бірқатар өңірінде ауа райына байланысты ескерту жарияланды

Қазақстанның 16 өңірінде қолайсыз ауа райына байланысты ескерту жарияланды, деп хабарлайды Bugin.kz порталы.

Қазгидромет мәліметінше, бірқатар өңірде қар жауып, боран соғып, кей жерлерде жаңбыр аралас жауын-шашын күтіледі. Әсіресе, солтүстік облыстарда боран көтерілсе, Алматы, Жетісу және Түркістан өңірлерінде жаңбыр жаууы ықтимал.

Сонымен қатар кей жерлерде тұман түсіп, жолдарда көктайғақ пайда болады. Желдің екпіні кей өңірлерде секундына 28 метрге дейін күшеюі мүмкін.

"Түнгі уақытта Ақмола, Солтүстік Қазақстан, Қызылорда және Жетісу облыстарында республикалық маңызы бар кейбір жол учаскелері жабылды. Жолға шығар алдында 1403 байланыс нөміріне хабарласып, ауа райы жағдайын нақтылап алу ұсынылады", – делінген хабарламада.

Бұған дейін Қазгидромет 22-24 ақпан аралығындағы ауа райы болжамын жариялаған болатын. Мамандардың болжамынша, батыс және солтүстік-батыс өңірлерде жауын-шашын қар мен жаңбыр түрінде түсіп, ауа температурасы көтеріледі. Алайда солтүстік аймақтарда күндіз ауа температурасы төмендеуі мүмкін.