Кәрім Мәсімовтің Астанадағы зәулім үйі сатылмай қалды

Астанада Ұлттық қауіпсіздік комитетінің бұрынғы төрағасы Кәрім Мәсімовке тиесілі зәулім сарай өтпей жатқанын жеткізді, деп хабарлайды Bugin.kz порталы. 

Бұған дейін аталған нысан 25 ақпанда сағат 10:00-де аукционға шығарылатыны туралы хабарланған. Алайда E-Qazyna платформасындағы мәліметке сәйкес, аукцион басталған сәтте үйді сатып алуға ниет білдіргендер болмаған. Сол себепті үй өтпеген.

Кәрім Мәсімовтің элиталық жер үйі елорданың Нұра ауданындағы Ерейментау көшесінде орналасқан. Зәулім сарайдың бастапқы бағасы – 1,8 млрд теңге, ал кепілдік жарнасы 117,9 млн теңгені құрайды. Нысан сатылымға Қайтарылған активтерді басқару компаниясы арқылы қойылған.

Айта кетейік, Мәсімов қамауға алынғаннан кейін дәл осы үйден 17,2 млн доллар қолма-қол ақша, бағалы сағаттар, алтын құймалар, антиквариат және өзге де құнды заттар тәркіленген. Сарайдың ішінде бассейн, жаттығу залы, би алаңы мен кинозал бар.

Еске сала кетсек, ҰҚК-нің бұрынғы басшысы Кәрім Мәсімов мемлекетке опасыздық жасағаны үшін 18 жылға бас бостандығынан айырылған еді.