Қазақстанда алғашқы АЭС салынатын жер анықталды

Қазақстанда алғашқы атом станциясының құрылысы қайда жүргізілетіні ресми түрде анықталды, деп хабарлайды Bugin.kz порталы. 

Атом электр станциясы Алматы облысының Жамбыл ауданында салынады. Қаулы нормативтік актілер базасына енді. 

“Алматы облысы Жамбыл ауданында “атом электр станциясы” ядролық қондырғысын салу туралы шешім қабылдансын”,- деп жазылған құжатта.

Қаулы 2024 жылғы 30 желтоқсанда қабылданды. Оған премьер-Министр Олжас Бектенов қол қойды. Бірақ құжат бүгін, 25 ақпан күні ресми жарияланып, күшіне енді. 

Айта кетсек, 2 қыркүйекте Президент Қасым-Жомарт Тоқаев АЭС салу мәселесі бойынша республикалық референдум өткізу туралы Жарлыққа қол қойған болатын. Ал референдум 6 қазанда өтті. Дауыс берген қазақстандықтардың 71,12 пайызы АЭС салуды қолдады.

Қазақстанның ықтимал технология жеткізушілері қатарында "Росатом" (Ресей), CNNC (Қытай), KHNP (Корея) және EDF (Франция) компаниялары бар. Сонымен қатар, мемлекет халықаралық консорциум құру мәселесін қарастырып жатыр.

Президент Қасым-Жомарт Тоқаевтың айтуынша, АЭС құрылысы Қазақстанның энергетикалық қауіпсіздігін нығайтуға ұзақмерзімді инвестиция болады.