Семейде оқушыны соққыға жыққандар арнайы мектепке жіберіледі

Семейде оқушыны оқушыны соққыға жыққан жасөспірімдер арнайы мектепке жіберілетін болды, деп хабарлайды Bugin.kz порталы. 

Кәмелетке толмағандардың құқықтарын қорғау жөніндегі комиссия осындай шешім қабылдады. Оқушыға күш көрсеткен барлық жасөспірімдер девиантты мінез-құлықтағы балаларға арналған арнайы мектепке жіберіліп, түзету курсынан өтеді. Оларға психологтар көмек көрсететін болады. Сонымен қатар үш жасөспірімнің әке-шешесі ата-ана құқығынан айырылып, екі балаға қатысты қамқоршылық тоқтатылды.  

“Құқықбұзушыларға қатысты сотқа дейінгі тергеу басталды. Материалдар одан әрі қарау үшін сотқа жолданды”, - деп мәлімдеді полиция.

Еске салайық, әлеуметтік желіде бір топ жасөспірім мектеп оқушысын соққыға жыққан видео тарады. Жәбірленуші 6-сынып оқушысы екен.  
Бұзақылар оқушының басынан, кеуде тұсынан тоқтаусыз тепкілеген. Қазір бұл оқиға бойынша қылмыстық іс қозғалды. Тәртіп бұзған балалардың ата-аналары полицияға жеткізілді. Жасөспірімдер арнайы есепке қойылып, олардың тәртібін кәмелетке толмағандар құқығын қорғау жөніндегі комиссия қарайды.