Енді сот-медициналық сараптама үшін мәйітті кеспейді

Елімізде мәйітті кеспей зерттеу әдісі енгізіледі, деп хабарлайды Bugin.kz порталы. 

Сот-медициналық сараптамаға цифрландырудың осындай мүмкіндіктері қарастырылып отыр. Яғни, мүрде компьютерлік сканерлеу арқылы тексеріліп, адам өлімінің негізгі себебі анықталмақ. 

Бұл жаңашылдық "Виртуалды аутопсия" деп аталады. Бірақ бұл әдіс зорлық-зомбылықтан қайтыс болған адамдарға қолданылмайды.

Бұл туралы әділет министрі Ерлан Сәрсембаев үкімет отырысында айтты.

Министр сондай-ақ жақын арада Қазақстанда бірнеше сараптама түрлері автоматтандырылатынын айтып, бұл адам факторымен байланысты қателіктерді болдырмауға мүмкіндік беретінін мәлімдеді.

“Бұл сарапшының зерттеу барысында жасаған әрекеттерін қадағалауға, сондай-ақ зерттеу, әрекеттер мен әрекетсіздіктен туындаған ауытқуларды алдын ала ескертуге мүмкіндік береді. Сондай-ақ, зерттеулерді жүйе ішінде жүргізу және адам факторы “қателіктерін” болдырмау үшін арнайы функция қарастырылады”, — деп түсіндірді ол.