"Декреттік төлемді" заңсыз көбейткен аналардың үстінен қылмыстық іс қозғалуы мүмкін

Енді Қазақстанда «декретке миллионмен» шыққан аналардың үстінен қылмыстық іс қозғалуы мүмкін. Бұл туралы Еңбек және халықты әлеуметтік қорғау министрі Светлана Жақыпова мәлімдеді, деп хабарлайды Bugin.kz порталы.

Оның сөзінше, кейбір азаматтар декреттік төлемдерді жасанды түрде көбейтуге тырысқан.

"2024 жылы 1,4 миллион азаматқа 958 миллиард теңге әлеуметтік төлем берілген. Алайда кейбір адамдар заңнамалық олқылықтарды пайдаланып, табысын көбейтіп, мемлекеттен жоғары мөлшерде төлем алуға тырысқан", – деді ол.

Айтуынша, мұндай әрекеттер әлеуметтік әділеттік қағидаларына қайшы келіп, бюджетке артық салмақ түсірген.

"Ресми мәліметтерге сүйенсек, 113 әйел осындай заңсыз тәсілдер арқылы 158,4 миллион теңге көлемінде төлем алған. Сонымен қатар 2024 жылдың қыркүйегінен бастап 1,5 мыңға жуық азамат өз табысын қолдан көбейткенін мойындап, мемлекетке 3,4 миллиард теңге қайтарды", – деп қосты ол.

Министр  аталған мәселенің алдағы уақытта қайталанбауы үшін арнайы заңнамалық өзгеріс болатынын атап өтті.

"Жоспарланған реформалар әлеуметтік сақтандыру жүйесінің қаржылай тұрақтылығын қамтамасыз етуге бағытталған", – деді Жақыпова.