Су жаңа министр халыққа адал қызмет етуге ант берді

Бүгін Үкіметтің кезекті отырысында жаңадан тағайындалған Өнеркәсіп және құрылыс министрі Ерсайын Нағаспаев Қазақстан халқына адал қызмет етуге ант берді, деп хабарлайды  Bugin.kz порталы.

"Қазақстан халқы мен президенті алдында өз Отаным – Қазақстанның экономикалық және рухани даму ісіне барлық күш-жігерім мен білімімді жұмсауға, мемлекеттің Конституциясы мен заңдарын қатаң сақтауға, өзімнің барлық іс-әрекетімде заңдылық пен әділеттілік, азаматтық, ұлтаралық және конфессияаралық татулық принциптерін ұстануға, Қазақстан халқына адал қызмет етуге, өз елімнің мемлекеттілігі мен дүниежүзілік қоғамдастықтағы беделін нығайта беруге салтанатты түрде ант етемін", - деді Нағаспаев.

Премьер-министр Олжас Бектенов жаңадан тағайындалған министрге жауапты қызметінде сәттілік тіледі.

Айта кетейік, Ерсайын Нағаспаев президент жарлығымен Өнеркәсіп және құрылыс министрі болып тағайындалды. Бұған дейін бұл қызметті атқарған Қанат Шарлапаев Президенттің экономикалық мәселелер жөніндегі көмекшісі лауазымына ауысты.