Қазақстанда жеке куәліктер мен төлқұжаттарды ауыстыру онлайн жүргізілуі мүмкін

Қазақстанда мерзімі өткен жеке куәліктер мен төлқұжаттарды онлайн режимде ауыстыру мүмкіндігі пайда болуы мүмкін. Бұл бастама Ішкі істер министрлігі мен Цифрлық даму, инновациялар және аэроғарыш өнеркәсібі министрлігі әзірлеген пилоттық жобаның аясында қарастырылуда, деп хабарлайды Bugin.kz порталы.

Жоба туралы құжат "Ашық НҚА" порталында жарияланған.

"Басты мақсат – Қазақстан азаматтарына паспорттар мен жеке куәліктер беру қызметін оңтайландыру. Жаңа жүйе қолданыстағы рәсімге балама ретінде мерзімі өткен құжаттарды онлайн түрде ауыстыру мүмкіндігін ұсынады", – делінген түсіндірме жазбада.

Енді қазақстандықтар жеке куәлігінің мерзімі аяқталған жағдайда құжаттарын электронды үкімет порталы мен мобильді қосымшалар арқылы жаңарта алады.

Алайда бұл қызмет тек белгілі бір жағдайларда қолжетімді болмақ:

Егер жеке куәліктің мерзімі аяқталуына 30 күнтізбелік күннен аз уақыт қалған болса;

Немесе оның жарамдылық мерзімі өткеніне 10 күннен аспаған жағдайда.

Құжат 19 наурызға дейін қоғамдық талқылауға ұсынылған.