САЯСАТ

Бектенов мемлекеттік органдарға ескерту жасады

Авторларды қолдау орталығы

mediabugin@gmail.com

Фото: primeminister.kz

Премьер-министр Олжас Бектенов ESTA Construction компаниясының бас директоры Мұстафа Топракпен кездесіп, Қазақстандағы ірі газ-химия жобасын талқылады. Тараптар Маңғыстау облысында карбамид пен аммиак өндіретін зауыт құрылысына қатысты мәселелерді қарастырды, деп хабарлайды Bugin.kz порталы. 

Құны $1,35 млрд болатын жоба «Құрық» теңіз порты маңында жүзеге асырылмақ. Логистикалық тұрғыдан тиімді орналасқан зауыт жылына 700 мың тонна карбамид пен 42 мың тонна аммиак өндірмек. Бұл тыңайтқыштар импортына тәуелділікті азайтып, қазақстандық ауыл шаруашылығын қосылған құны жоғары өніммен қамтамасыз етуге мүмкіндік береді. Жобаны іске асыру барысында 3 мыңға дейін маман жұмылдырылып, зауыт іске қосылғаннан кейін 400 тұрақты жұмыс орны ашылады.

Қазіргі таңда Қазақстанда үш түрлі тыңайтқыш өндіріледі: аммиак селитрасы, аммофос және аммоний сульфаты. Алайда ішкі сұраныс жылына 3,2 млн тоннаны құраса, отандық өндіріс оның 56%-ын ғана қамтамасыз етеді. Сол себепті карбамид өндірісін жолға қою тыңайтқыш импортын қысқартуға және елдің азық-түлік қауіпсіздігін нығайтуға ықпал етпек.

"Мемлекет басшысы агроөнеркәсіп кешенін дамытуға ерекше мән береді. Өткен жылы елімізде рекордтық өнім жиналды. Үкімет егіншілерді қолдауға 700 млрд теңге бөлді. Алдыңғы қатарлы агротехнологиялар мен тыңайтқыштарға қолжетімділікті арттыру – басты міндеттердің бірі. Сондықтан сіздердің жобаңыз біз үшін стратегиялық маңызға ие", — деді Бектенов.

Кездесу барысында ауыл шаруашылығы өндірушілеріне мемлекеттік қолдау шаралары да сөз болды. Бүгінде тыңайтқыштар құнының 60%-ына дейін субсидиялау жүйесі жұмыс істейді, ал 2024 жылдың наурызынан бастап аванстық субсидиялау механизмі іске қосылды. Былтыр бұл мақсатқа 46,4 млрд теңге бөлінсе, 2025 жылы 35 млрд теңге қарастырылған.

Кездесу қорытындысы бойынша тиісті мемлекеттік органдарға жобаны жеделдетілген тәртіппен рәсімдеуді және екі апта ішінде ESTA Construction компаниясымен инвестициялық келісімге қол қоюды қамтамасыз етуді тапсырды.