Астанада "резеңке" пәтерлер жойылады: тұрғындарды тіркеуге шектеу енгізілмек

Елордада тұрақты және уақытша тұратын азаматтарды тіркеу тәртібі қатаңдатылмақ. Осыған байланысты тұрғын үйдегі тіркеу нормативін бекіту ұсынылып отыр. Бұл өзгеріс "Кейбір заңнамалық актілерге астананы және республикалық маңызы бар қалаларды дамыту мәселелері бойынша өзгерістер мен толықтырулар енгізу туралы" заң жобасында қарастырылған, деп хабарлайды Bugin.kz порталы.

Вице-премьер – Ұлттық экономика министрі Серік Жұманғариннің айтуынша, заң жобасы аясында елордадағы көші-қон үдерісін реттеу көзделген.

"Әлемдегі ірі қалаларда жоғары деңгейдегі білім беру, медицина, инфрақұрылым және технологиялық даму шоғырланған. Бұл урбанизация қарқынын жеделдетіп, халықтың ірі қалаларға қоныс аударуына ықпал етеді. Біздің елде де дәл осындай үрдіс байқалады. Соның салдарынан тұрғындар тіркеуге шектеусіз жазылатын «резеңке» пәтерлер мәселесі туындады. Кейбір пәтер иелері онда тұрмайтын жүздеген адамды тіркеген жағдайлар да кездесті", – деді Жұманғарин Мәжілістің жалпы отырысында.

Осы мәселені шешу мақсатында пәтерде тіркелетін адамдар санына шектеу енгізу ұсынылып отыр.

"Мәслихаттың шешімімен бір адамға қанша шаршы метр тиесілі екені нақты белгіленеді. Егер тіркеу саны бекітілген нормативтен асып кетсе, мұндай жағдайға жол берілмейді. Бұл талап тұрғын үй иесі, оның жұбайы және жақын туыстарына қолданылмайды", – деп түсіндірді министр.

Сонымен қатар, тұрғын үйде тіркелгенімен, онда тұрмайтын адамдарды есептен шығармау жағдайларына қатысты әкімшілік жауапкершілік күшейтіледі.