Енді пайдаланылмаған жер телімдері аукционға шығарылады – Жұманғарин

Мәжілісте Премьер-министрдің орынбасары – Ұлттық экономика министрі Серік Жұманғарин «Қазақстан Республикасының кейбір заңнамалық актілеріне астананы және республикалық маңызы бар қалаларды дамыту мәселелері бойынша өзгерістер мен толықтырулар енгізу туралы» заң жобасын бірінші оқылымда таныстырды, деп хабарлайды Bugin.kz порталы.

Құжат аясында Мәжіліс депутаттары жер телімдерін мақсатсыз пайдаланудың алдын алу мақсатында жаңа тетіктер енгізді.

Серік Жұманғариннің айтуынша, енді жер учаскесі жеке меншікке тиесілі болғанымен, егер ол көзделген мақсатына сәйкес пайдаланылмаса, аукцион арқылы сатылуы тиіс. Бұл жағдайда бұрынғы меншік иесіне тек жерді бастапқы сатып алу құны ғана өтеледі. Егер аукционда жер учаскесі қымбат бағаға сатылса, айырмашылық бюджетке түседі.

Министрдің сөзінше, бұл механизм жер алып, оны пайдаланбай ұстап отыратын меншік иелерінің алыпсатарлық әрекеттеріне тосқауыл қояды. Сонымен қатар, аукционға үлестес тұлғалардың қатысуына шектеу қойылып, жер бағасының жасанды түрде қымбаттауына жол берілмейді.

Мәжіліс депутаттары заң жобасын алғашқы оқылымда қолдап, мақұлдады.