Қазақстандық кәсіпкерді сан соқтырған алаяқ Германияда қолға түсті

Қазақстандық кәсіпкерді алдап, 100 млн теңгеден астам қаржысын иемденген күдікті Германияда ұсталып, елімізге экстрадицияланды, деп хабарлайды Bugin.kz порталы. 

Бас прокуратура Қазақстан Республикасы Сыртқы істер министрлігінің көмегімен күдіктіні қылмыстық жауапкершілікке тарту үшін Германиядан қайтарғанын мәлімдеді.

Тергеу мәліметінше, 2023 жылдың қаңтарында ол екі сыбайласымен бірге алдын ала сөз байласу арқылы жалған компаниялар құрып, қазақстандық кәсіпкерге жұмсақ бидайдың ірі партиясын жеткіземіз деп уәде берген. Нәтижесінде жәбірленуші 100 млн теңгеден астам қаражатын алаяқтарға беріп, сан соғып қалған.

Құқық қорғау органдары күдіктілердің бірін жедел ұстаған, ал қалған екеуі қашып кетіп, халықаралық іздеуге жарияланған. 2024 жылдың қазанында іздеуде жүргендердің бірі Германияның Нюрнберг қаласында қолға түсіп, Қазақстан Бас прокуратурасының сұрауы бойынша елге экстрадицияланды.

Қазіргі таңда ол тергеу изоляторына қамалды. Заң бойынша аталған қылмыс үшін мүлкін тәркілей отырып, 5 жылдан 10 жылға дейін бас бостандығынан айыру жазасықарастырылған.