Алматы әуежайында ер адам қызметкерді пышақпен қорқытып, кепілге алған

Алматы халықаралық әуежайында ер адам қауіпсіздік қызметінің қызметкерін кепілге алып, пышақпен қорқытқан, деп хабарлайды Bugin.kz порталы. 

Әуежай өкілдерінің мәліметінше, оқиға 7 наурыз күні сағат 11:45 шамасында ұшу алдындағы тексеру аймағында болған.

Жолаушы ретінде таныстырған ер адам ішкі рейстер терминалындағы (Т1) тексеру аймағына келген. Авиациялық қауіпсіздік қызметінің скрининг офицерлері одан құжаттарын көрсетуді сұраған. Алайда кенеттен ер адам қызметкердің шашынан ұстап, пышақпен қорқыта бастаған.

7 минуттан кейін әуежайдың желілік полиция бөлімінің қызметкерлері мен авиациялық қауіпсіздік қызметінің мамандары жедел әрекет етіп, ер адамды ұстады. Оның пышағы тәркіленді.

Қазіргі уақытта ол полиция бөлімінде, ал құқық қорғау органдары оқиғаның мән-жайын анықтап жатыр.