Қазақстанның 8 өңірінде су тасқыны жүруі мүмкін — Экология министрі

Қазақстанда көктемгі су тасқыны қаупі күшейіп келеді. Экология және табиғи ресурстар министрі Ерлан Нысанбаев Үкімет отырысында жаңартылған ауа райы болжамын ұсынды, деп хабарлайды Bugin.kz порталы.

Оның айтуынша, биыл наурыз-сәуір айларында ауа температурасы әдеттегіден жоғары болады, ал жауын-шашын мөлшері нормадан көп түседі. Бұл көктемнің ерте келуіне және су тасқыны қаупінің артуына ықпал етеді.

Су тасқыны қаупі қандай өңірлерде жоғары?

Қауіп деңгейі жоғары аймақтар:

Ақтөбе, Қостанай, Қарағанды, Ақмола, Солтүстік Қазақстан, Шығыс Қазақстан, Ұлытау және Абай облыстары.

Орташа қауіп төнетін өңірлер:

Алматы, Жетісу, Жамбыл, Батыс Қазақстан және Атырау облыстары.

Қауіп деңгейі төмен облыстар:

Павлодар, Маңғыстау, Түркістан және Қызылорда облыстары.

Министрлік қандай шаралар қабылдауда?

Биыл Қазгидромет алғаш рет әр облыс бойынша егжей-тегжейлі гидрологиялық анықтамалар дайындады. Бұл құжатта:

Су деңгейінің ең жоғары болжамды көрсеткіштері;

Ағын көлемі мен жылдамдығы;

Су тасқыны қаупі бар елді мекендер;

Су тасқынының болжамды мерзімдері қамтылған.

Сонымен қатар, өткен аптадан бастап Қазгидромет апта сайынғы гидрологиялық болжамдар жариялай бастады. Егер гидрометеорологиялық жағдай күрт өзгерсе, екі-үш күн бұрын арнайы ескерту жасалатыны хабарланды.

Премьер-министр қандай тапсырма берді?

Үкімет отырысында Премьер-министр Олжас Бектенов бұл мәселені жергілікті әкімдердің ерекше бақылауында ұстау керектігін айтты.

“Су тасқыны кезеңіне аз уақыт қалды. Әкімдер төтенше жағдайдың алдын алу үшін барлық жүйенің тұрақты жұмысын қамтамасыз етуі тиіс. Әлеуметтік желілер мен БАҚ арқылы халықты ақпараттандыруды күшейту қажет. Төтенше жағдайлар министрлігі толық дайындықта болуы керек”, – деді Бектенов.

Сондай-ақ Премьер-министр жақын арада республикалық жедел штабтың отырысын өткізуді тапсырды.