Түркістанда 15 млн теңгені жымқырған шенеуніктер сотталды

Түркістан облысында табиғатты қорғауға бөлінген 15 млн теңгеге жуық бюджет қаражаты жымқырылған. Қаржы сапасыз өнімдерді арзан бағамен сатып алу арқылы қолды болған, деп хабарлайды Bugin.kz порталы.

Бұл туралы ҚР Жемқорлыққа қарсы іс-қимыл агенттігі хабарлады.

Антикордың мәліметінше, Түркістан қалалық соты облыстық Табиғат пайдалану және табиғи ресурстар басқармасына қарасты «Жасыл аймақ» КММ-нің бұрынғы басшысы И. Бегасилов пен оның орынбасары А. Ерназаров, КММ заңгері М. Айнабекова және кәсіпкер И. Муслимовқа қатысты үкім шығарды.

Тергеу барысында олар техникалық талаптарға сәйкес келмейтін пестицидтер мен гербицидтерді сатып алу арқылы 14,9 млн теңге көлемінде бюджет қаражатын жымқырғаны анықталған.

Сот үкіміне сәйкес, И. Бегасилов 2 жыл 6 айға бас бостандығынан айырылса, оның сыбайластары Ерназаров, Айнабекова және Муслимов 2 жылға бас бостандығын шектеу жазасына кесілді.

Сонымен қатар, сотталғандар өмір бойы мемлекеттік және квазимемлекеттік секторда жұмыс істеу құқығынан айырылды.

Алайда сот үкімі заңды күшіне енген жоқ.