ҚМДБ мешітте балаларға аяғын уқалатқан имамға ескерту жасады

Қазақстан мұсылмандары діни басқармасы (ҚМДБ) Түркістан облысындағы мешітте болған оқиғаға қатысты ресми мәлімдеме жасап, қоғамда дау туғызған әрекет үшін мешіт имамына ескерту жасалғанын мәлімдеді, деп хабарлайды Bugin.kz порталы.

“Мешіт – құлшылық үйі, жамағат жиналатын рухани орда, қасиетті мекен, тәрбие орны. Құлшылық үйіне келген адам мешіт әдебін сақтауы тиіс. Бұл – мұсылманның көркем мінезінің бір.

Түркістан облысы Сарыағаш ауданындағы мешітте болған оқиға әлеуметтік желілерде тарап, қоғамның түрлі пікір қайшылығын тудырды. Осыған орай Қазақстан мұсылмандары діни басқармасы қасиетті орында қоғам наразылығын тудырған әрекетке жол бергені үшін мешіт имамына ескерту жасады.  

Қазақстан мұсылмандары діни басқармасы еліміздегі барша мұсылман жамағатын құлшылық үйлерінде дауыс көтеріп сөйлемеуге, әдепсіз әрекеттерге жол бермеуге, ұрыс-керіс жасамауға шақырады. Жамағатты барынша мешіт әдебін сақтауға үндейміз”, – делінген ҚМДБ мәлімдемесінде.

Айта кетейік, бұған дейін әлеуметтік желілерде Сарыағаш медресесінің бас ұстазы Әбдужаппар Смановтың әрекеті қоғамда үлкен резонанс тудырған еді. Журналист Ораз Әлімбек Facebook парақшасында медресе ұстазының оқушыларға аяғын уқалатып отырған видеосын жариялап, оның орынсыз әрекеті туралы жазған.