Енді Қазақстанда тұтынушылардың құқығын бұзған кәсіпкерлерге айыппұл салынады

Қазақстанда 13 наурыздан бастап Әкімшілік құқық бұзушылық туралы кодекске (ӘҚБтК) енгізілген өзгерістер күшіне енді. Бұрын кәсіпкерлер тұтынушылардың құқықтарын бұзған жағдайда тек ескертумен шектелсе, енді оларға айыппұл салынады, деп хабарлайды Bugin.kz.

Жаңа талаптар бойынша тұтынушылардың құқықтарын бұзу деп мыналар саналады:

Тұтынушылардың құқықтары туралы ақпаратты орналастырмау

Шағымдарға уақытында жауап бермеу

Тауарды қайтару мерзімдерін сақтамау

Айыппұл мөлшері:

Шағын бизнес – 15 АЕК (2025 жылы 58 980 теңге)

Орта бизнес – 20 АЕК (78 640 теңге)

Ірі бизнес – 25 АЕК (98 300 теңге)

Бұл өзгерістер туралы Сауда және интеграция министрлігіне қарасты Тұтынушылардың құқықтарын қорғау комитеті төрағасының орынбасары Серік Құсайынов мәлімдеді. Оның айтуынша, жаңа шаралар азаматтардың құқықтарын қағаз жүзінде ғана емес, іс жүзінде де қорғауды қамтамасыз етуге бағытталған.

Тұтынушылардың шағымдары артып келеді

Тұтынушылардың құқықтарын қорғау комитетінің мәліметінше, 2024 жылы 62,5 мың шағым тіркелген. Ал 2025 жылдың алғашқы екі айында ғана 10 мыңнан астам арыз түскен. Көпшілік шағымдары туризм, ТКШ (тұрғын үй-коммуналдық шаруашылық), денсаулық сақтау және сауда салаларына қатысты.

Қосымша өзгерістер:

Әлеуметтік маңызы бар азық-түлік өнімдеріне шекті үстемеақыны заңсыз көтергендерге айыппұл салынады:

Жеке тұлғалар мен шағын бизнес – 5 АЕК (2025 жылы 19 660 теңге)

Орта бизнес – 35 АЕК (137 620 теңге)

Ірі бизнес – 150 АЕК (589 800 теңге)

Кәсіпкерлік қызметке заңсыз араласқан лауазымды тұлғаларға жаза күшейтілді. Егер мемлекеттік қызметкер бір жыл ішінде қайтадан кәсіпкерлікке заңсыз араласса, оған 200 АЕК (786 400 теңге) мөлшерінде айыппұл салынады.

Бұл шаралар бизнес пен тұтынушылар арасындағы қатынасты реттеп, азаматтардың құқықтарын қорғауды күшейтуге бағытталған.