“Артында тұрған күштерді анықтау қажет”. Бапи діни ағымдарға қарсы шараларды күшейтуді талап етті

Мәжіліс депутаты Ермұрат Бапи радикалды діни ағымдарды тексеруді қатаңдатуды талап етті. Сонымен қатар ол Қазақстанның туын қорлап, әлеуметтік желіге салғандардың әрекеттеріне қатысты шаралар ұсынды, деп хабарлайды Bugin.kz порталы. 

Депутат интернет-ресурстар мен қоғамда ұлттың қастерлі мұраларына, салт-дәстүрлерімізге жасалып жатқан шабуылдардың толастамай тұрғанын атап өтті.

“Өткен жылы жат діни ағымның жетегінде кеткен біреулер “Домбыра – харам” деп, қазақтың ең құнды музыкалық аспабын іске алғысыз етуге тырысты. Тағы бір топ адам киіз үй ішінде жартылай жалаңаштанып, қоғамның ашуын туғызды. Енді, мемлекетіміздің басты рәміздерінің бірі – Көк туымызды қорлап, қоғамда үлкен резонанс тудырып отыр. Жуырда Атырауда болған оқиға да азаматтардың ашуын келтірді”, - деді депутат.

Бапи мемлекеттік туды қорлауды бүкіл халықты, тұтас мемлекетті қорлау деп бағалады.

“Көк туымыздағы араб қарпіндегі жазу сапалы баспа құралымен таңбаланған. Бұл тек тұрмыстық бұзақылық емес, ашық қарсылық. Ту – әрбір қазақстандық үшін қасиетті құндылық. Оның бүлдірілуі заңға қайшы және қылмыстық жауапкершілікке әкелуі тиіс”, - деп мәлімдеді депутат.

Сонымен қатар Ермұрат Бапи ұлттық туымызды мазақ етіп, сатылымға шығарған маркетплейстерге де құқықтық баға беруді ұсынды.

“Қазақстан туы Wildberries Russ маркетплейсінде 5000 теңгеге сатылып жатыр. Бұл – мемлекет Конституциясына қарсы әрекет. Біз зайырлы мемлекет болғанымызбен, ұлттық құндылықтарымыз заңмен қорғалады. Егер теріс ағымдық іс-әрекеттер қоғамның тұрақтылығын бұзуға бағытталса, оны мемлекеттік саясаттан тыс қарастыра алмаймыз”, - деді депутат.

Бапи осы мәселеге байланысты бірнеше ұсыныс жасады.

"Құқық қорғау органдары арандатушылыққа алданғандардың артында тұрған күштерді анықтап, ұйымдастырушыларға қатаң жаза қолдануы тиіс. Мемлекеттік рәмізді сатуға шығарған сауда орындарының басшылары жауапқа тартылуы керек. Сонымен қатар, діни құндылықтарды бұрмалауға қарсы шараларды күшейтіп, ұлттық бірегейлікті қорғаудың жүйелі саясатын қалыптастыру қажет", - деп қорытындылады депутат.