Алматыда жалдамалы пәтерден 5 мыңға жуық SIM-карта табылды: үш шетелдік ұсталды

Алматыда жалдамалы пәтерге жүргізілген тінту барысында үш шетелдік азаматтан 5 мыңнан астам SIM-карта анықталды, деп хабарлайды Bugin.kz порталы. 

Қаржы мониторингі агенттігінің (ҚМА) мәліметінше, Алматы қаласы бойынша департамент қызметкерлері үш шетелдікті ұстады. Тінту кезінде алты SIM-бокс пен әртүрлі мобильді операторлардың 5 мыңнан астам SIM-картасы тәркіленді. Бұл құрылғылар алаяқтық схемаларда кеңінен қолданылады, атап айтқанда жаппай қоңырау шалу, хабарлама тарату және абоненттік нөмірлерді өзгерту мақсатында пайдаланылады.

Құқық қорғау органдары ұсталған азаматтарға қатысты ҚР Қылмыстық кодексінің 213-бабы 2-бөлігі бойынша сотқа дейінгі тергеу басталғанын мәлімдеді. Бұл бап ұялы байланыс құрылғыларының идентификациялық кодын заңсыз өзгерту, сондай-ақ осындай мақсаттағы бағдарламаларды әзірлеу, тарату және пайдалану әрекеттерін қамтиды.

ҚМА өкілдерінің айтуынша, күдіктілер екі айға қамауға алынған. Қазіргі уақытта олардың интернет-алаяқтыққа қатысы бар-жоғы тексерілуде.