Перизат Қайрат ісі: тергеу аяқталып, жаңа мәліметтер жарияланды

Перизат Қайратқа қатысты қылмыстық іс бойынша тергеу аяқталды. Бұл туралы Қаржылық мониторинг агенттігі төрағасының орынбасары Жеңіс Елемесов мәлімдеді, деп хабарлайды Bugin.kz порталы. 

Тергеу барысында келтірілген залал сомасы 3,5 миллиард теңге деп белгіленді.

“Иә, Перизат Қайратқа қатысты тергеу толық аяқталды. Қазір процеске қатысушылар іс материалдарымен танысып жатыр. Тергеу кезінде залал сомасына байланысты әртүрлі мәліметтер айтылды, алайда соңғы есеп бойынша нақты сома – 3,5 млрд теңге”, – деді Елемесов Сенаттың кулуарында.

Гүл дүкені және күмәнді қаржы операциялары

Тергеу деректеріне сәйкес, Перизат Қайрат гүл дүкенін сатып алу арқылы өзін кәсіпкер ретінде көрсетуге тырысқан. Сонымен қатар оның анасына қатысты да “алаяқтық” бабымен қылмыстық іс қозғалған. Агенттік мәліметінше, ол ақшаны жылыстату бойынша күдікке ілінген. Анасы қызының қаржылай әрекеттеріне көмектесіп, түскен қаражатты өз шотына аударып отырған.

Перизат Қайраттың мүлкіне қатысты шешімді сот шығарады.

“Ол мүлік жәбірленушілерге келтірілген залалды өтеуге жұмсалуы мүмкін немесе мемлекет кірісіне аударылуы мүмкін”, – деп мәлімдеді ҚМА өкілі.

Алайда Перизат Қайрат өзіне тағылған айыптарды мойындаудан бас тартқан.