Бишімбаевтың әкесі жеке университет ашайын деп жатыр ма? — министрлік жауап берді

Әлеуметтік желілерде экс-министр Қуандық Бишімбаевтың әкесі Уәлихан Бишімбаев Таразда жеке университет ашатыны туралы ақпарат тарады. Бұл мәліметке Ғылым және жоғары білім министрлігінің қоғаммен байланыс департаментінің директоры, баспасөз хатшысы Олжас Беркінбаев жауап берді, деп хабарлайды Bugin.kz порталы. 

Таратылған ақпаратқа сәйкес, университет жаңа оқу жылынан бастап студенттерді қабылдап, азаматтық, қылмыстық, халықаралық, корпоративтік, қаржылық және салық құқығы, зияткерлік меншік және төрелік бағыттары бойынша мамандар даярламақ. Сонымен қатар университеттің ректоры Уәлихан Бишімбаевтың өзі болады деп көрсетілген.

Министрлік не дейді?

Олжас Беркінбаевтың айтуынша, Қазақстан Республикасының “Білім туралы” заңына сәйкес, жоғары білім беру саласында қызмет көрсету үшін міндетті түрде лицензия алу қажет.

“Жоғары және жоғары оқу орнынан кейінгі білім беру саласындағы кез келген қызмет лицензиялануға жатады. Қазақстан Республикасының “Рұқсаттар және хабарламалар туралы” Заңына сәйкес, рұқсат немесе хабарлама тәртібі белгіленген қызмет түрлерін заңды және жеке тұлғалар тиісті құжаттарсыз жүзеге асыра алмайды”, – деді министрлік өкілі.

Министрлік мәліметінше, “Bishimbayev University” атауымен лицензия берілмеген, сондай-ақ е-лицензиялау жүйесінде тиісті өтінім тіркелмеген. Осыған байланысты, тараған ақпарат ресми расталмаған.