ҚМА Перизат Қайрат пен анасының миллиардтарды жымқыру схемасын әшкереледі

Қаржылық мониторинг агенттігі (ҚМА) 14 наурызда Перизат Қайрат пен оның анасы Ғайни Алашбаеваның әрекеттеріне сараптама жүргізіліп, олардың аса ірі көлемде алаяқтық жасап, заңсыз жолмен алынған қаражатты заңдастыруға қатысы бар екені анықталғанын мәлімдеді, деп хабарлайды Bugin.kz порталы. 

Қайырымдылықты жамылған алаяқтық

Перизат Қайрат 2021-2024 жылдар аралығында халықтан бірнеше рет қаржылай көмек сұрап, қаражаттың мұқтаж балаларға, Палестина халқына және су тасқынынан зардап шеккендерге бағытталатынын айтқан. Алайда, тергеу мәліметтеріне сәйкес, жиналған қаражат жеке мақсаттарға жұмсалған.

“Барлығы 3,5 млрд теңге жымқырылған. Перизат Қайрат «Biz Birgemiz Qazaqstan 2030» қоғамдық қорының шотына түскен қаражатты өз есепшотына және анасы Ғайни Алашбаеваның шотына аударып, оны зергерлік бұйымдарға, сәнді киімдерге, жиһазға, шетелге саяхаттарға, жөндеу жұмыстарына, көлік жалдауға және басқа да жеке шығындарға пайдаланған”, – делінген ҚМА хабарламасында.

Су тасқынынан зардап шеккендерге жиналған 2,8 млрд теңге жымқырылған

2024 жылдың 1 сәуірі мен 15 қарашасы аралығында су тасқынынан зардап шеккендерге көмек көрсету үшін қор шотына 2,8 млрд теңге жиналған. Бірақ бұл қаражаттың басым бөлігі жымқырылғаны анықталды.

“Қылмыстық табысты жасыру мақсатында ол 16 жеке кәсіпкермен металдан жасалған киіз үйлер, қайықтар, етіктер және басқа да тауарларды жеткізу бойынша жалған келісімдер жасаған. Бірақ бұл келісімдер іс жүзінде орындалмаған”, – делінген ресми мәлімдемеде.

Тергеу мәліметтеріне сәйкес, 1 млрд теңгеден астам қаражат қолма-қол ақшаға айналдырылып, жеке мақсаттарға жұмсалған.

Жалған сатып алулар мен күмәнді келісімдер

– 72 млн теңге “Солтүстік Қазақстан облысындағы зардап шеккендерге тұрмыстық техника алу” деген желеумен Ғайни Алашбаеваның шотына аударылып, кейін қолма-қол ақшаға айналдырылған.

– 6,9 млн теңге элиталық Rolex сағатын сатып алуға жұмсалған.

– 2024 жылдың қаңтарында Палестинаға көмек ретінде жиналған қаражаттың бір бөлігі “Rebel flowers” гүл бизнесін сатып алуға пайдаланылған. Компанияны сатып алу құны 23 млн теңге болғанымен, келісімшартта бұл сома 2 млн теңгеге төмендетіліп көрсетілген. Кейін бұл бизнес 69 млн теңге табыс әкелген.

– Ұрланған қаржыға 4 автокөлік, 4 пәтер, 2 автотұрақ орны, үй, жер телімі және коммерциялық нысан сатып алынған.

– Жалпы құны 158 млн теңге болатын зергерлік бұйымдар, аяқ киімдер мен сөмкелер тәркіленді.

– 865 млн теңге көлеміндегі заңсыз жолмен алынған мүлікке тыйым салынды.

Қазіргі таңда Ғайни Алашбаева үйқамаққа алынып, тергеу амалдары жалғасып жатыр.