Павлодар облысында 2,1 млрд теңге бюджет қаржысы үш жыл бойы пайдаланылмаған

Павлодар облысындағы мемлекеттік кәсіпорынның шотында үш жылдан астам уақыт бойы пайдаланылмаған 2 млрд теңге “Қазақтелеком” АҚ-ға аударылды, деп хабарлайды Bugin.kz порталы. 

Жоғары аудиторлық палатасының мәліметінше, қазынашылық аудиторларының тексерісі нәтижесінде, бұл қаржы бақылау шотында ұзақ уақыт бойы игерілмегені анықталды. Павлодар облысы әкімдігіне осы қаражаттың әрі қарай пайдаланылуын қамтамасыз ету тапсырылды. 18 наурыздағы мәлімет бойынша, бұл қаражат бұған дейін жасалған келісімшартқа сәйкес “Қазақтелеком” компаниясына аударылды.

Қазіргі уақытта шотта қалған 114 млн теңгенің қайда жұмсалатыны қарастырылуда. Жоғары аудиторлық палата бұл мәселені бақылауда ұстап, мемлекеттік аудит қорытындысына сәйкес басқа да тапсырмалардың орындалуын қадағалауын жалғастырып жатыр.