Әйелін аяусыз ұрып-соққан экс-дипломат қамауға алынды

Астана қаласының Полиция департаменті бұрынғы дипломат Сәкен Мамашқа қатысты тергеу жұмыстарының барысы туралы мәлімет берді, деп хабарлайды Bugin.kz порталы Tengrinews.kz-ке сілтеме жасап.

Полиция департаментінің баспасөз қызметі редакция сауалына жауап бере отырып, өткен жылы Қазақстанның шет елдегі елшілігінде кеңесші болған Сәкен Мамашқа қатысты жұбайын жүйелі түрде соққыға жыққаны үшін қылмыстық іс қозғалғанын хабарлады.

Құқық қорғау органдары арнайы тергеу-жедел тобын құрып, оқиғаның барлық мән-жайын анықтау мақсатында қажетті сараптамаларды жүргізген. Қазіргі уақытта айтарлықтай дәлелдемелер жиналып, тергеу нәтижесі бойынша күдіктіге қатысты қамауға алу түріндегі бұлтартпау шарасы қолданылған.

Тергеу мүддесіне байланысты басқа мәліметтер жария етілмей отыр.

Еске сала кетсек, 2024 жылдың мамыр айында әлеуметтік желіде БАӘ-дегі Қазақстан елшілігінің кеңесшісі Сәкен Мамаштың жұбайын жүйелі түрде ұрып-соғатыны туралы ақпарат тараған болатын. Осыған орай, Сыртқы істер министрлігі дипломаттың шұғыл түрде елге қайтарылатынын мәлімдеген еді.