Белгілі қазақстандық актер сүйіктісін соққыға жыққан

Белгілі актер Шәріп Серік бұрынғы сүйіктісі Әлия Бутееваны соққыға жыққан. Аталған оқиға бойынша полиция тексеріс жүргізіп жатыр, деп хабарлайды Bugin.kz порталы. 

Әлеуметтік желіде Әлия Бутеева есімді қыз актер Шәріп Серікке қатысты видеолар мен суреттерін жариялады. Кадрларда актердің лифтке кірген қыздың артынан жалаң аяқ жүгіріп шығып, оны қолынан жұлқып шығарып алғаны байқалады.

Бутееваның жазбасындағы мәліметке сүйенсек, Шәріп Серік бұрынғы сүйіктісіне қол көтеріп, оны соққыға жыққан. 

“Мен ешқашан мұндай жағдайға тап боламын деп ойламадым. Сүйікті адамымның қол көтергенін айту — мен үшін өте ауыр. Алайда бәрін айтуыма тура келді. Қарым-қатынастың қандай да бір шегі болуы керек. Егер мен осы суреттер мен видеоларды жарияламасам, өзіме сатқындық жасаған болар едім. Мен өзімді және ар-намысымды қорғауға мәжбүрмін”, – деп жазды Әлия.

Қазіргі уақытта полиция оқиғаға қатысты тексеріс жүргізіп, мән-жайды анықтап жатыр. Алматы қалалық Полиция департаментінің өкілдері бұл дерек бойынша барлық қажетті шаралар Қазақстан Республикасының заңнамасына сәйкес жүзеге асырылатынын хабарлады.

Осы оқиғадан кейін Sәlem Entertainment компаниясы актер Шәріп Серікпен ынтымақтастықты тоқтату туралы шешім қабылдады. Компанияның мәлімдемесінде, соңғы оқиғаларға байланысты актер “қара тізімге” енгізілгені және оның қатысуымен түсірілген жобалар тоқтатылғаны айтылған.

“Бұған дейін жарияланған “Шакал” сериалы мен “Qarga” сериалының үшінші маусымы ресми түрде жабылды. Сонымен қатар, актер “Meow” сериалының екінші маусымында басты рөлдердің бірін сомдауы тиіс болған, алайда ол жобадан толықтай алынып тасталды", - делінген хабарламада.

Сондай-ақ “Патруль: последний приказ” фильмінің шығармашылық ұжымы актердің қатысуымен түсірілген көріністерді кинонұсқадан алып тастау жұмыстарын белсенді жүргізіп жатыр.