Енді қазақстандықтарды әскерге SMS хабарлама арқылы шақыруы мүмкін

Қазақстан Қорғаныс министрлігі азаматтарды мерзімді әскери қызметке шақыру тәртібіне өзгерістер енгізуді көздейтін жаңа ереже жобасын қоғам талқысына шығарды, деп хабарлайды Bugin.kz порталы. 

Құжат "Ашық НҚА" порталында жарияланды. Онда әскери қызметке шақыруды ұйымдастыру мен өткізудің нақты тәртібін бекіту, бірыңғай тәсілдерді енгізу және кейбір рәсімдерді жеңілдету қарастырылған. Атап айтқанда, әскерге шақырудан кейінге қалдыруды енді мемлекеттік қызмет арқылы рәсімдеуге мүмкіндік берілмек.

Жобадағы маңызды жаңалықтардың бірі – азаматтарды SMS арқылы шақыру. Яғни, әскерге шақырылуға жататын азаматтың ұялы телефонына жіберілген SMS-хабарлама ресми ескерту құралы ретінде танылады.

Құжат 2025 жылғы 9 қыркүйекке дейін ашық қоғамдық талқылауға ұсынылған.