22 ел көшбасшысының ішінде Си Цзиньпиннің Қасым-Жомарт Тоқаевқа ерекше ықыласы байқалды

Қытай Халық Республикасының Төрағасы Си Цзиньпиннің Қазақстан Президенті Қасым-Жомарт Тоқаевқа ерекше ықыласы белгілі болды, деп хабарлайды Bugin.kz порталы Tengrinews-ке сілтеме жасап. 

30 тамызда Қазақстан Президенті Қытайдың Тяньцзинь қаласына барып, жоғары деңгейде келіссөздер жүргізді. Сонымен қатар Тоқаев Шанхай ынтымақтастық ұйымы саммитіне және “ШЫҰ плюс” форматындағы отырысқа қатысуды жоспарлап отыр.

Президент жанындағы журналист Си Цзиньпиннің Қасым-Жомарт Тоқаевқа деген ерекше ықыласы туралы айтты. 

“Қытайда Си Цзиньпин келген 22 көшбасшының тек үшеуіне ғана жеке қабылдау ұйымдастырды. Құрметті қонақтар қатарында Қасым-Жомарт Тоқаев (сондай-ақ Ресей мен Үндістан басшылары) бар. Кешкі ас екі сағатқа созылды, онда ресми рәсімдердің ресмилігінен гөрі сенім мен достыққа толы жылы атмосфера орнады. “Қымбатты досым” деген сөз бірнеше рет айтылып, әрбір ишарадан қазақстандық делегацияға деген ерекше ықылас байқалды. Мұндай қатынас қазіргі қазақ-қытай байланысының дипломатиялық этикет шеңберінен әлдеқашан асып кеткенін айқын көрсетеді”, – деп жазды Әділ Балтабаев.

Еске салайық, маусым айында Қасым-Жомарт Тоқаев: “Көрші Қытайдың бейнесінде Қазақстан мәңгілік әрі сенімді стратегиялық серіктес, шынайы дос тапт”, ал “Орталық Азия мен Қытай арасындағы қарым-қатынас мәңгілік, барлық жағдайға бейімделетін және жан-жақты стратегиялық әріптестік деңгейіне көтерілді”, – деген болатын.

Бұған дейін Tengrinews.kz тілшісіне берген сұхбатында профессор Сюэ Фуци Қасым-Жомарт Тоқаевты қытайлық қоғам мен сарапшылар қауымы мол тәжірибесі бар тұлға ретінде қабылдайтынын, ал оның қытай тілін білуі Қазақстан Президентіне Си Цзиньпинмен өте жақын, сенімді қарым-қатынас орнатуға мүмкіндік беретінін айтқан еді.