Абай облысындағы жол апаты: дәрігерлер зардап шеккен балаларға қатысты мәлімдеме жасады

Абай облысында болған жол апатынан зардап шеккен екі бүлдіршін жақында ауруханадан шығады, деп хабарлайды Bugin.kz порталы.

Бұл туралы Астана қаласының Денсаулық сақтау басқармасы мәлімдеді. Бұған дейін балалар Абай облысынан елордадағы №2 көпсалалы қалалық балалар ауруханасына жеткізіліп, дәрігерлердің жіті бақылауына алынған болатын.

"Екі балаға да ота сәтті жасалды. Қазіргі жағдайлары тұрақты, алдағы күндері үйлеріне жіберіледі", – делінген ресми хабарламада.

Еске салайық, бұған дейін Абай облысының Үржар ауданында кәмелетке толмаған балалар қатысқан ауыр жол-көлік оқиғасы тіркелген еді. Қайғылы апат салдарынан 2 мен 7 жас аралығындағы үш бала көз жұмды. Сонымен қатар 6-9 жас аралығындағы тағы үш бала түрлі жарақат алып, ауруханаға жеткізілді.