Қазақстанда балаларды психологиялық диагностикалау және сүйемелдеу бойынша цифрлық платформа құрылады

Бұл туралы ҚР Оқу-ағарту министрлігі мәлімдеді.

Жаңа платформа балалардың психологиялық және мінез-құлық ерекшеліктерін жүйелі түрде талдауға, олардың эмоционалдық күйін тұрақты бақылауға және қолдауды қажет ететін балаларға атаулы көмек көрсетуге бағытталған. Цифрлық форматқа көшу ведомствоаралық әрекеттерді оңтайландырып, функциялардың қайталануын жояды, сондай-ақ мамандардың жұмыс жүктемесін айтарлықтай жеңілдетеді.

«Қазақстан балалары» тұжырымдамасының аясында педагог-психологтар институтын дамытуға және балалардың психологиялық қауіпсіздігін қамтамасыз ететін жүйені толықтай жаңғыртуға басымдық беріледі.

Атап айтқанда, келесі шараларды іске асыру жоспарланып отыр:

- Білім беру бағдарламасына балалардың эмоционалдық интеллектін дамыту сабақтарын қосу.

- Зорлық-зомбылық құрбандарына арналған оңалту кабинеттерін ашу.

- Психолог мамандардың кәсіби стандарттарын бірегейлендіру және біліктілігін арттыру жүйесін реформалау.

- Мамандарды киберқауіпсіздік және дағдарыстық психология бағытында оқытуды міндеттеу.

- Бала мен отбасын қолдаудың негізі ретінде кейс-менеджмент институтын нығайту.

- Қылмыстық процестер мен ведомствоаралық жұмыстарда психологтардың міндетті қатысуын заңнамалық деңгейде қамтамасыз ету.

Бұл бастамалар психологиялық жұмысты жүйелі профилактикалық арнаға бұруға, педагог-психолог мамандардың кәсіби мәртебесін нығайтуға мүмкіндік береді. Нәтижесінде еліміздің кез келген өңіріндегі әрбір балаға сапалы, үздіксіз және кәсіби психологиялық қолдау көрсету кепілдендіріледі.