Қазақ руханиятын әлемге танытатын «Көкжиектен асқан үн» халықаралық жобасы көрерменге жол тартты

Димаш Құдайбергеннің шығармашылық жобасы халықаралық деңгейдегі танымал әншілердің назарына ілікті. Өнер иесінің еңбегін әлемдік музыка элитасы – Пласидо Доминго, Андреа Бочелли, Лара Фабиан және композитор Игорь Крутой ресми түрде қолдады. Сондай-ақ Саймон Уэбб пен Степан Хаусер де жылы лебіздерін білдірген.

Жобамызды қолдап, құттықтаған әлемдік жұлдыздарға және барша қолдау білдіріп жатқан ағайынға үлкен рақмет! Бұл – біз үшін өте қуанышты әрі шабыт беретін сәт. Осындай қолдау алға қарай одан әрі сеніммен қадам басуға күш береді. Жобаның алғашқы эпизоды көрермендерге жол тартты. Келесі аптада көріскенше! – деп жазды Димаш Құдайберген әлеуметтік желідегі парақшасына.

Димаштың продюсерлігімен қолға алынған бұл жоба ұлттық дәстүр мен заманауи стильді біріктіріп, еліміздің рухани әлеуетін әлемге паш етпек. Автордың айтуынша, бұл жоба — Қазақстанның мәдени бейнесін жаңаша қалыптастыратын маңызды қадам.

Айта кетейік, айтулы жобаның тұсаукесерін 14 ақпан күні «Қазақстан» телерадиокорпорациясының эфирінен тамашалауға болады.