Nauryz Sale: Қазақстандықтарды мерекелік жеңілдіктер маусымы күтуде

Елімізде бастау алатын республикалық акцияның басты мақсаты — ішкі сауданы жандандырып, қазақстандықтар мен ел қонақтары үшін бірегей мерекелік ауан қалыптастыру.

Акция кезеңінде сауда нысандары халық ең көп тұтынатын азық-түлік және тұрмыстық тауарлар топтарына 10%-дан 70%-ға дейін жеңілдіктер жариялайды. Бұл — мерекелік дастарханды ысырапсыз жайнатуға және қажетті бұйымдарды айтарлықтай үнеммен сатып алуға берілген тамаша мүмкіндік болмақ.

Акциялық тауарлар сауда залдарында арнайы мерекелік навигация және "Nauryz" фирмалық безендіруі арқылы белгіленеді.

Тұтынушылардың тауар таңдауын жеңілдету мақсатында сауда залдарына тақырыптық безендіру элементтері мен POS-материалдар енгізіледі. Атап айтқанда, брендтелген нұсқағыштар мен арнайы баға тақталары арқылы азаматтар акция аясындағы өнімдерді еш қиындықсыз анықтай алады. Бұл жүйе ассортимент ішіндегі ең тиімді ұсыныстарды жылдам табуға арналған.

Акцияға ішкі сауда саласының шамамен 300 субъектісі қатысады. Олардың қатарында 140 сауда үйі мен сауда-ойын-сауық орталығы, 140 сауда желісі және 20 электрондық сауда субъектісі бар. 

Биылғы «Nauryz Sale» науқанының басты ерекшелігі — отандық өндірушілерді қолдауға басымдық берілуі. Отандық өнімдерді дәріптеу мақсатында сауда нысандарында арнайы көрме-сатылым аймақтары ашылады. Науқан тек тиімді саудамен шектелмей, келушілерге нағыз мерекелік көңіл-күй сыйлауды көздейді. Еліміздің ірі сауда-ойын-сауық орталықтарында тұрғындар мен қонақтар үшін мазмұнды интерактивті бағдарламалар әзірленген.