Сәуле Базархан «Smart Beauty Clinic» жекеменшік клиникасында жергілікті анестезиямен жасалған жоспарлы липосакция операциясынан кейін көз жұмды

Орын алған қайғылы жағдайдан кейін «Smart Beauty Clinic» ресми мәлімдеме жариялады. Клиника бұл оқиғаның ұжымға өте ауыр тигенін атап өтіп, кәсіпкер Сәуле Базарханның жақындары мен отбасына қайғыра көңіл айтты.

«Қазіргі уақытта болған жағдай бойынша заңнамада қарастырылған процедуралар жүргізіліп жатыр. Дәрігерлік құпияны сақтау қажеттілігіне, пациенттің отбасына деген құрметке, сондай-ақ жүргізіліп жатқан шаралардың объективтілігіне байланысты клиника ресми процедуралар аяқталғанға дейін оқиғаның мән-жайы мен медициналық егжей-тегжейіне қатысты көпшілік алдында түсініктеме беруді жөн санамайды», - делінген мәлімдемеде.

Сонымен қатар «Smart Beauty Clinic» әкімшілігі клиникада қазіргі уақытта пациенттерді қабылдау уақытша тоқтатылғанын мәлімдеді.