Қазақстанда жұмыс орнындағы харассмент заңмен реттелмек

«Бұл түзетулер Халықаралық еңбек ұйымының ұсынымдары негізінде әзірленді. Заң жобасында, біріншіден, харассмент пен жыныстық сипаттағы қысым ұғымдары нақтыланды. Екіншіден, мұндай фактілер анықталған жағдайда жұмыс берушінің жауапкершілігі қарастырылды», – деді Асқарбек Ертаев.

Министрдің мәлімдеуінше, қазіргі уақытта аталған түзетулер бизнес-қоғамдастық өкілдерінің қатысуымен талқылау кезеңінен өтуде. Заң жобасын ағымдағы жылдың күзгі сессиясында Парламенттің қарауына енгізу көзделген.

Біріккен Ұлттар Ұйымының 2022 жылғы деректері бойынша, жаһандық деңгейде қызметкерлердің шамамен 23%-ы жұмыс орнында зорлық-зомбылыққа немесе жыныстық қудалауға ұшырайды. БҰҰ сарапшылары зардап шегушілердің басым бөлігі қоғамдық айыптаудан немесе жұмысынан айырылудан қорқып, фактілерді жасыратындықтан, бұл көрсеткіш шынайы жағдайды толық көрсете алмайтынына тоқталған.