Шығыс Қазақстанда ішімдіктен бас тартқан ауылдар саны 28-ге жетті

ШҚО Полиция департаментінің мәліметінше, бұл қатарды соңғы болып Тарбағатай ауданына қарасты Қамысты ауылының тұрғындары толықтырған. Жергілікті халық ішімдік өнімдерін тұтынудан толықтай бас тарту туралы бір ауыздан шешім қабылдаған.

«Бүгінде ауылда 22 үй бар, онда 89 адам тұрады. Тұрғындар санының аздығына қарамастан, ауыл халқы қоғамдық өмірге белсенді араласып, өскелең ұрпақты тәрбиелеуге, отбасылық құндылықтарды сақтауға және қоғамдағы қолайлы ахуалды нығайтуға ерекше көңіл бөледі. «Алкогольсіз ауыл» бастамасына қосылу туралы шешімді жергілікті жұрт ерікті түрде және бірауыздан қабылдады, – делінген ақпаратта.

Жергілікті тұрғындардың айтуынша, ішімдіктен бас тарту денсаулықты жақсартуға, қоғамдық жауапкершілікті арттыруға және өскелең ұрпаққа дұрыс тәрбие беруге қолайлы орта қалыптастырады. Осындай игі бастама негізінде  Қамысты ауылы Шығыс Қазақстан облысы бойынша алкогольсіз өмір салтын таңдаған 28-ші елді мекен болып тіркелді.