Қазақстандық музыкант ұлттық аспаптардың үнімен Netflix сериалына саундтрек жазды

Жобаның басты ерекшелігі де осында – қазақстандық композитордың шығармашылық топқа қосылуының нәтижесінде миллиондаған көрермені бар фэнтези сериалда ұлттық музыкалық мұрамыз насихатталмақ. Танымал туындының саундтрегінен домбыра мен қобыздың үні ерекше нақышта орын алады деп күтілуде.

Бұл туралы Дана Зұлпыхар Instagram желісіндегі парақшасында хабарлады.

«Netflix сериалы үшін домбыра мен қобызды жазу – мен үшін үлкен мәртебе», – деп жазды Дана Зұлпыхар.

Айта кетейік, қазіргі таңда Дана Зұлпыхар АҚШ-тың Лос-Анджелес қаласында тұрады және сол жақта өзінің шығармашылық қызметін белсенді жалғастырып келеді. Ол негізінен киноиндустрияға арналған музыка жазумен қатар, авторлық әндерін де жарыққа шығарумен айналысады. Көпшілік асыға күткен «Аватар: Аанг туралы аңыз» сериалының екінші маусымы жақын уақытта Netflix платформасында көрерменге жол тартады деп жоспарлануда. Отандық сазгердің туындылары мен ұлттық аспаптарымыздың үні танымал жобаның ажырамас бөлігіне айналатын күн де алыс емес.