Kaspi Gold енді Google Pay-да – NFC технологиясы арқылы төлем жасау іске қосылды

Енді төлем қызметін Kaspi.kz қосымшасы немесе тікелей Google Wallet арқылы қосу өте оңай. Жаңа мүмкіндіктің арқасында әлемнің кез келген еліндегі дүкендерде, мобильді қосымшаларда және интернет желісінде қауіпсіз әрі жылдам төлем жасауға болады.

Kaspi.kz басшысы әрі негізін қалаушылардың бірі Михаил Ломтадзе:

«Біз әрбір Kaspi.kz клиентінде кез келген жағдайда төлем жасаудың ыңғайлы тәсілі болғанын қалаймыз.

Kaspi QR смартфон моделіне қарамастан барлық клиентке қолжетімді. Kaspi Alaqan телефонсыз-ақ алақанмен төлем жасауға мүмкіндік береді. Енді Android құрылғыларын пайдаланатын клиенттер Kaspi Gold картасын Google Pay немесе Google Wallet қызметіне қосып, Қазақстанда да, шетелде де NFC қолдайтын смартфон, смарт-сағат немесе басқа құрылғы арқылы төлем жасай алады.

Біз сүйікті клиенттерімізге таңдау мүмкіндігін көбейтіп, әр күнге қолайлы жағдай жасауға қуаныштымыз! – деп жазды әлеуметтік желідегі парақшасында.

Картаны Google Pay жүйесіне қосудың екі оңай жолы:

Kaspi.kz қосымшасы арқылы: Пайдаланушы суперқосымша ішіндегі «Менің Банкім» бөліміне өтіп, «Kaspi Gold» картасын таңдайды. Содан кейін «Google Pay қосу» батырмасын басып, экранда пайда болған нұсқауларды орындаса жеткілікті.

Google Wallet арқылы: NFC байланыссыз төлем технологиясын қолдайтын кез келген Android құрылғысында Google Wallet қосымшасын ашып, Kaspi Gold картасын тікелей сонда тіркеуге болады.

Google Pay арқылы қалай төлем жасалады?

Картаны сәтті қосқаннан кейін клиенттер үшін  төлемнің екі бағыты ашылады:

Офлайн сауда нүктелерінде: Байланыссыз төлемді қабылдайтын кез келген дүкенде, мейрамханада немесе қызмет көрсету орындарында Android смартфонын немесе смарт-сағатты терминалға жақындату арқылы лезде есеп айырысуға болады.

Интернет-дүкендерде (Онлайн): Ең басты артықшылықтардың бірі – Google есептік жазбасына кірген кез келген құрылғы арқылы онлайн сауда жасау мүмкіндігі. Бұл ретте қолданушының Android немесе iOS (iPhone) құрылғысын пайдалануы маңызды емес. Интернет-дүкендердегі тауарды рәсімдеу кезінде тек «GPay» батырмасын басу арқылы уақыт үнемдеп, онлайн төлемді қауіпсіз жүргізуге болады.