БІЛІМ
Отандық мектеп оқушылары Колумбияның Букараманга қаласында өткен 56-шы Халықаралық физика олимпиадасында (IPhO) тарихи нәтиже көрсетті. Шілденің 4-12 аралығында ұйымдастырылған додада ел намысын қорғаған бес жеткіншектің барлығы да алтын тұғырдан көрінді. Қазақстан құрамасы өз тарихында алғаш рет жүз пайыздық көрсеткішпен бес алтын медальді қоржынға салып, әлемдік деңгейде үздік екенін дәлелдеді, деп хабарлайды Bugin.kz.
Фото: Оқу-ағарту министрлігі
Биылғы зияткерлік сайысқа жер шарының 85 елінен жиналған 381 дарынды жас қатысып, өзара бақ сынасты. Өте күрделі теориялық тапсырмалар мен терең логиканы, сондай-ақ жоғары практикалық дайындықты талап ететін эксперименттік есептерді шешуде отандастарымыздың бағы жанды. Ел мақтанышына айналған алтын медаль иегерлері – елордалық өрендер Нұргүл Егенбергенова, Әмірбек Азатбеков, Ілияс Қазымбек, Дамир Құрман және алматылық дарын Роман Черемнов.
Оқу-ағарту министрлігінің мәліметінше, бұл жетістіктің артында ұлттық құраманың үш жылға созылған табанды әрі жүйелі дайындығы тұр. Оқушыларды додаға шыңдау ісіне мектеп мұғалімдері мен тәлімгерлерден бөлек, отандық жетекші жоғары оқу орындарының ғалымдары да атсалысқан. Олимпиада барысында команда жұмысына PhD деңгейіндегі білікті оқытушылар Гүлия Нұрбақова, Самат Мақсұтов және халықаралық жарыстардың бұрынғы жүлдегері Әлішер Еркебаев жетекшілік етті.
Айта кетейік, негізі 1967 жылы қаланған бұл жаһандық додаға Қазақстан құрамасы 1997 жылдан бері тұрақты қатысып келеді. Өткен 2025 жылғы сында екі күміс пен үш қола еншілеген оқушыларымыз биыл өз нәтижелерін еселеп қана қоймай, отандық білім беру саласының халықаралық аренадағы беделін жаңа биікке көтерді.
Bugin.kz
Қосымшаны жүктеп алыңыз
Мемлекеттік сатып алу бойынша
8 705 324 11 61
