Қазақстанда 40 рет қан тапсырған адамдарға «Құрметті донор» төсбелгісі берілмек

Алғашқы кезеңде бұл мәртебелі марапатқа еліміз бойынша 481 отандасымыз ие болады деп жоспарлануда. Бұл марапатты иеленудің өзіндік талаптары бекітілген. Жаңа ережеге сәйкес, төсбелгіні алу үшін азаматтардың қан немесе тромбоцит тапсыру көрсеткіші кемінде 40 ретке жетуі тиіс. Ал қан плазмасын тапсырушылар үшін бұл меже кем дегенде 70 рет деп белгіленген.

Ерекше дизайнмен дайындалатын төсбелгілерді шығару ісі Қазақстан теңге сарайына сеніп тапсырылды. Оның көркемдік жобасын Геральдика жөніндегі республикалық комиссия арнайы бекіткен. Төсбелгінің негізгі композициясы қанық қызыл түсті эмальмен көмкерілген қан тамшысы бейнесінде жасалып, ол қамқорлықты білдіретін алақанды көрсетеді. Ал тамшының ішіне адам өмірінің символы ретінде жүрек ырғағы орналастырылып, сырты күңгірт дөңгелек жиекпен көркемделген.

Денсаулық сақтау министрлігінің пайымдауынша, жаңа төсбелгінің тағайындалуы жылдар бойы қан тапсырып келген азаматтардың еңбегіне берілген әділ баға болып табылады.

«Енді олардың игі ісі ерекше мәртебемен айқындалып, жоғары бағаланып отыр», – деп есептейді ДСМ.

Қазіргі уақытта елімізде жыл сайын 180 мыңнан астам адам донор атанып, шамамен 255 мың рет қан тапсыру процедурасынан өтеді. Осы игі істің арқасында жыл сайын 80 мыңға жуық науқастың өмірі сақталып, олардың сапалы қан компоненттерін алуына мүмкіндік туып отыр. Дегенмен, соңғы уақытта Қазақстанда донорлар санының біртіндеп азаю үрдісі байқалып отырғанын да мамандар жасырмайды. Жаңа марапат осы мәселенің оң шешілуіне септігін тигізбек.

Бұл үрдісті реттеу және донорлықты ынталандыру мақсатында мемлекеттік деңгейдегі жеңілдіктер де заңмен бекітілген. Мәселен, қан тапсырған күндері азаматтар заң бойынша жұмыстан босатылады және осы уақыт ішінде олардың орташа жалақысы толық сақталады. Жаңа төсбелгінің енгізілуі донорлардың қоғамдағы беделін арттырып қана қоймай, игі іске бет бұратын жаңа еріктілердің қатарын көбейтеді деген сенім мол.