16 жастағы қазақ қызы дзюдодан әлем чемпионы атанды

Қазақстан қоржыны тағы бір алтын медальмен толықты. 16 жастағы Фатима Супығалиева кадеттер арасындағы әлем чемпионатында 52 келіге дейінгі салмақта қарсыластарының бәрінен басым түсті.

Гуаякильде өтіп жатқан дүбірлі додада қазақстандық спортшы финалға дейін сәтті жетіп, шешуші белдесуде Украина өкілі Ксения Кирильчукпен кездесті. Фатима финалда қарсыласын жеңіп, әлем чемпионы атанды.

Бұл нәтиже қазақстандық әйелдер дзюдосы үшін тарихи жетістік саналады. Фатима Супығалиева Қазақстан тарихында кадеттер арасында дзюдодан әлем чемпионатының алтын жүлдесін жеңіп алған алғашқы қыз спортшы болды.

Жас дзюдошының жеңісімен Қазақстан құрамасының жүлде қоржыны да толықты. Қазіргі таңда ұлттық құрамада 2 алтын, 3 күміс және 4 қола медаль бар.

Осы көрсеткіштің арқасында Қазақстан құрамасы кадеттер арасындағы әлем чемпионатының жалпы медальдық есебінде көш бастап келеді.

Айта кетейік, кадеттер арасындағы әлем чемпионаты жас спортшылар үшін халықаралық аренадағы маңызды жарыстардың бірі саналады. Байрақты бәсекеде әлемнің үздік жас дзюдошылары бақ сынап жатыр.