Алматы әуежайында 32 келіден астам есірткі тәркіленді

Алматы халықаралық әуежайында есірткі тасымалдаудың үш фактісі анықталды. Оқиғалар тамыз айында болған.

ҰҚК Шекара қызметінің қызметкерлері шетел азаматтарының жүгін тексеру кезінде марихуана, каннабис шайыры және гашиш майын тапқан. Есірткі заттары косметикалық өнімдерге ұқсайтын арнайы ыдыстарға жасырылған.

Сараптама нәтижесінде тәркіленген заттардың жалпы салмағы 32 келіден асқаны анықталды.

Анықталған фактілер бойынша материалдар процессуалдық шешім қабылдау үшін тиісті мемлекеттік органдарға жолданды.

Құзырлы органдар әуежайларда жолаушылардың багажын тексеру арқылы есірткі заттарының ел аумағына заңсыз әкелінуіне тосқауыл қою жұмыстарын жалғастырып жатыр.